परीचय :

ओखलढुङ्गा जिल्ला मानेभन्ज्याङ गाउँपालिका भित्र जम्मा ९ वडाहरु छन् जसमध्ये ५ नं. वडा एक हो । यो वडा मानेभन्ज्याङ गाउँपालिकाको सदरमुकाम हो । भौगलिक पूर्वाधारको आधारमा यो वडा अन्य वडाको तुलनामा विकसित छ । जनगणना २०६८ को अनुसार वडाको जनसंख्या ३०७९ जना हो भने १७.१९ वर्ग किलो मिटर क्षेत्रफल रहेको छ । यसको पूर्वमा वडा नं. ३, पश्चिममा वडा नं. ४ र ९, उत्तरमा वडा नं. ४ र दक्षिणमा वडा नं. ६, ७ र ९ ले छोएको छ । पालिकाकै सबैभन्दा ठूलो बजार विहीबार लाग्दछ जसलाई विहीबार हटिया भनिन्छ । यस वडालाई सिद्धिचरण राजमार्गले छोएको छ भने बारुदखान, बिशल्जु राजाको दरबार, भोर्ले पोखरी, चमेरा गुफा, बाघ पाइले, मानेभन्ज्याङ हिटी नामले प्रख्यात छ । यहाँको मुख्य गाउँहरु उदयपुर, धिमिले, ओखरबोट, बालेथाम, बिजयटार, मानेभन्ज्याङ बजार, , भोर्ले, जेरुङ गाउँ, माथिल्लो रिचुवा, आदि हुन । राई, मगर, नेवार, क्षेत्री-बाहुन, विश्वकर्मा, परियार लगायत बजारमा मिश्रित जातिको बसोबास रहेको छ । महादेव स्थान सामुदायिक बन र उदयपुर सामूदायिक बन प्रमुख बनहरु हुन भने साना तिना अन्य बनहरु पनि रहेको छ । यहाँको मुख्य पेशा भनेको कृषि र वैदेशिक रोजगार रहेको छ । गाउँपालिकाको केन्द्रको वडा रहेकोले ३ वटा आवि र १ वटा मावि विद्यालयहरु सहित अधिकतम सरकारी कार्यालयहरु यसै वडा भित्र रहेको छ ।